قصائد عن العراق بس لحد يبجي

صورني بالكامره .. و ركز على جروحي..
تلكى العراق الغالي ساكن وسط روحي ..
لا تشوفني ابتسم اني الجرح بيه..
ومشتاك يا صاحبي لكل ام عراقيه ..
صورني بالكامره صورني قبل لااموت ..
واذا متت يا صاحبي ركزعلى التابوت..
اني احب دجله الوفي و من الفرات اشرب....
وارتاح يمهم يا صاحبي ومن ابتعد اتعب
::::::::::::::::

ما عاش اليذلك يا عــراق الخير ولا عاش الرسملك عالوجن دمعـة
عراق انتَ عراق أمشرف التاريخ وبيارغ هيبتك للعالم مشرعــة
ثوبك ثوب عزه وأنتَ تاج الراس يا رمز الحضارة وللمجد قلعــة
ابو الوكفات انتَ وأنتَ ابو الطيبات وابو جفوف السخية وطيب السمعة
مو أنته العراق البيك هيج يصير يالصايغ حياتك للعرب شمعــة
شچم واحد أجاك يلوذ من الجوع وتمد جفك خبز للجايع تشبعــة
وشچم واحد غرگ ويصيح ها يعراق تلاحكلي غركت وجفوفك طلعـة